Koddar

Sumarblogg

2007-06-25T23:55:00.000Z

Ætli sumarið sé loksins komið?

Nú tókst það ... Lífið í Lögbergi og gítarpartý aldarinnar...

2007-05-19T03:42:00.000Z

Með snjóinn upp að öxlum.... finnur ekkert lengur hér... sama hvað þú segir.. ekki lengur hægt að hugg'ann.. með snjóinn upp að öxlum.. tárin .. lotinn í herðum.. með snjóinn upp að öxlum... bíður honum að ganga inn... föl á vanga .. hvíslar við dyrnar.. ástin fylgir alltaf þér... grefur snjóinn burtu frá hans öxlum... Lífið í Lögbergi .. áður en allt gerðist ...

Kveðja Ragna um miðja nótt...

2007-05-19T03:35:00.000Z

Lífið í Lögbergi og gítar partý aldarinnar

2007-05-19T03:29:00.000Z

Þá byrjar það...

2007-04-16T13:08:00.000Z

Próflestur hófst formlega í dag, verð við eftir 11. maí..

Kv. Randó

Ég á mér ekkert líf....

2007-04-01T23:48:00.000Z

... önnur maraþon-helgi að baki. Ætli það verði ekki hin klassísku 5 mínútur í 4 skil á morgun?? Lærir maður af reynslunni? Nei!

Geisp og góða nótt,
RP

Maraþon-helgi

2007-03-26T15:25:00.000Z

Helgin og rúmlega það fór í að semja eitt stykki minnisblað í námskeiðinu Stjórnsýsluréttur III og frábært matarboð hjá MG. Maður ætlaði nú að vera penn og fara heim bara svona um miðnætti en "when you're having fun" o.s.frv. Maturinn var stórgóður, sömuleiðis eftirrétturinn og félagsskapurinn. Matarboðið og eftirleikurinn var alveg þess virði að vera til klukkan þrjú í nótt að klára minnisblaðið og svo er alltaf dálítið fjör að vera undir smá pressu á lesstofunni ásamt öðrum sveittum laganemum. Svo hitti ég líka Bellu gellu niðri í bæ og það er alltaf gaman.
Nú tekur við hálfs dags aflslappelsi og svo tekur við ritgerðarsmíð í Mati á umhverfisáhrifum sem á að skila um mánaðarmótin og þá er bara eitt verkefni eftir í Skuldaskilarétti. Eftir það koma svo páskar og stórafmæli "litla prinsins" (MP þessi var bara fyrir þig hehehe).

Kveðja, Pelgan

I got the finger.. (road rage?)

2007-03-21T08:48:00.001Z

Já mér var gefinn "fingurinn" í morgun. Það var hressandi!!!

Opið bréf til gefanda "fingursins"!
Þú eigandi hvítrar, eldri, skítugrar (sjáið að mér er ekki runnin reiðin), japanskrar, jeppadruzlu (Nissan eða Toyota) sem varst á hringtorginu við Hamraborg ættir að skammast þín... Ég viðurkenni fúslega að ég var dálítið að flýta mér en datt ekki í huga að ég væri að svína fyrir þig og ég er ansi hrædd um að hraði þinn hafi ekki verið löglegur á þessari stundu sem við áttum saman í hringtorginu?!!!??

Kjær kveðja, "Svínarinn"!

Annars held ég að hann (sýndist þetta vera karlmaður og hreinlega geri ráð fyrir því) hafi nú skammast sín því um leið og "fingurinn" var kominn upp fór hann jafnharðan aftur niður. En svona hefur áhrif á mann - fyrst varð ég alveg ægilega reið - langaði að elta hann og skamma hann og þvínæst langaði mig að taka niður númerið og skoða hver gæti verið svona ægilega vondur við MIG. Svo fór ég að skammast mín bæði fyrir þessar tilfinningar og fór að hugsa hvort að ég hefði nú kannski gert eitthvað rangt. Nú er ég komin á það stig að ég hugsa hlýlega til vinar míns og á alltaf eftir að gera.. Verst að nú þegar ég skrifa þetta þá endurlifi ég allar þessar tilfinningar og er orðin pínulítið reið út í vininn aftur! Jæja bezt að láta reiðina renna af sér og skoða hvað þeir eru að segja í skuldaskilum.

Yfir og út..

Var að hugsa....

2007-02-15T09:39:00.000Z

.. hvað Háskólinn er frábær staður. Hvar annars staðar sér maður svona breiðan hóp fólks? Þar er hægt að finna nunnur, ásatrúarmenn, múslima með höfuðklúta, fólk í hinum ýmsu litum, pönkara, ungt fólk, gamalt fólk, fólk með börn, börn (á laugardögum á Lögbergi), skiptinema, Breiðhyltinga, Kópavogsbúa, Skagfirðinga og Mývetninga... Gerist ekki betra!

Kv. Ragna og fjölmenningin

Mér að kenna að við töpuðum leiknum í gær!!!

2007-01-31T10:46:00.000Z

Ég var svo viss um sigur en ástæðan er einföld, við höfum unnið alla leikina sem ég hef horft á, ég horfði á þennan, ergo: við áttum að vinna. Eitthvað klikkaði þarna - kannski af því að ég skrapp frá í 10 mínútur til að taka saman eitt stykki bílabraut!! Það hlýtur að vera ástæðan því strákarnir stóðu sig vel. Ég kenni því samviskusemi húsmóðurinnar um tapið í gær!

Annars hef ég aldrei, aldrei æpt svona yfir einum leik og ég bið hér með nágranna mína afsökunar *roðn*!

Kv. Ragna Íslendingur

P.s. myndin er alls ótengd efni þessarar færslu en er nátengd efni síðasta föstudagskvelds ho ho ho ho You're poison...

Oral Exams ... stuttblogg.is

2006-12-04T00:09:00.000Z

I'm taking an oral exam on the 5th of December (International Environmental Law).
já best að byrja að æfa sig að tala ensku !!
Þetta verður spennandi. Getur maður talað ensku þegar maður er að farast úr stressi? Nei veit það ekki hef ekki prófað! En fæ að prófa það á þriðjudaginn... daddaradda-damm....

Og hvernig ber maður fram: anthropocentric og municipal? Ég veit það því internetið er yndislegt því þar get ég hlustað á menn og konur segja akkúrat þessi orð og fleiri.

Kv. R.P og UNCLOS

Úlfjótur er eðalnáungi....

2006-11-03T10:59:00.000Z

Í kvöld ætla ég að dé joð a emm emm a!!! Við lögfræðipíur ætlum í móttöku á Borginni sem haldin er vegna þess að í dag er hátíðisdagur Úlfljóts - kannski að maður fái sér Sex and the City kokteil???
Við ætlum fyrst að hittast heima hjá "nágrannanum" Mæju Páls og fá okkur gott í gogginn. Mæja er nýkomin úr ævintýraferð frá Tælandi þar sem hún fór meðal annars á matreiðslunámskeið og sá ladyboys (ekki í sömu andránni, ímynda ég mér þó að þetta tvennt fari áreiðanlega ágætlega saman). En það er allavega spurning hvort að við skellum ekki svuntu á Mæs? Ef ekki þá eldar sendillinn bara! Svo skellum við okkur á Borgina í okkar fínasta pússi (ohhhh í hverju á ég að vera??? Hin eilífa andsk... spurning) og reynum kannski að standa aðeins upp frá barnum andstætt við það sem við gerum í fyrra (fliss). Mæju Kay ELSA verður sárt saknað en hún er svo busssy við ráðstefnuhöld og dinnerhöld með einhverju fínu Evrópudómstólsliði að hún kemst ekki - kannski bara og vonandi sjáum við hana í móttökunni.
Þetta verður sennilega síðasta djamm fyrir próflestur því að nú er bara allt að gerast! Þarf að skila 4 verkefnum/ritgerðum í nóvember og svo er fyrsta prófið 5. des en próftaflan mín lítur svona út:
5. des (International Environmental Law I)
11. des (Verktaka- og útboðsréttur)
13. des. (Ofbeldisbrot frá sjónarhóli kvennaréttar)
15. des. (Vinnumarkaðsréttur)
en þá er ég líka búin 15. des. Hvað ég á að gera þá veit ég ekki. Er ekki vön því að vera búin svona snemma og langar til að gera svo margt - er svo gráðug. Langar í jólatívolí í Köben eða vera heima að taka til og baka!!! Æ svo hefur maður allt lífið til að taka til og baka iss held að Vodafone herferðin sé að ná til mín - NOW!!! Gera eitthvað spennandi í staðinn fyrir að sótthreinsa - jamm held það sé málið! Tek kannski eina sort með barnunganum sem elskar eldhússtörfin....

Kveðja Randa sem er að fara á rand....

Nýtt líf.....(fögur fyrirheit)

2006-10-04T14:08:00.000Z

Á morgun skal ég læra eins og enginn hefur lært áður. Ástæðan er einföld! Í dag fæ ég nýja tölvu. Ég stend nefnilega í þeirri trú að þessi veraldlegur hlutur geti bjargað mér frá eilífri leti. Undarlegt hvað maður getur endalaust blekkt sjálfan sig: eftir að ég fæ tölvuna get ég byrjað, verð ógeðslega dugleg þegar ég kem heim frá Árósum, æ sef út núna og svo aldrei aftur o.s.frv. Annars er tilefni þessara tölvukaupa það að tryggingafélagið VÍS hefur greitt mér þá gömlu sem var dæmd ónýt eftir ýmis áföll sem heimilistryggingin dekkaði og því höfum við fest kaup á nýrri ASUS tölvu frá Boðeind - eðalgripur alveg hreint og með vefmyndavél þannig að elskulegar "skandinavískar" og íslenskar vinkonur mínar geta séð mína fögru ásjónu í gegnum MSNið. Eru þið ekki farnar að hlakka til? (Ekki það að ég ætli eitthvað að fara að hanga á MSN allan daginn þar sem ég verð svo ægilega upptekin við hið nýja lærdómslíf....eða sko þannig...)

Kveðjur og svo framvegis, Ragna lata bloggstúlkan

B.A. - partý í október...

2006-08-31T12:45:00.000Z

VEIIIIIIIIII

Lokuð frá heiminum...

2006-05-09T10:31:00.000Z

.. í bókstaflegri merkingu. Ég sit á Lögbergi hitti alltaf sama fólkið dag eftir dag (sem betur fer er það ágætt þetta fólk). Vinnuvélarnar fyrir utan hamast við að byggja Háskólatorg en eyrnatappar og Peltor "eyrnaskjól" bjarga því sem bjargað verður. Ég var í prófi númer tvö í gær og mér til mikillar furðu mundi ég heila beinagrind um viðtökudrátt og gvöð sé lof fyrir það því spurningin gilti 40% og nota bene þetta var allur kaflinn í bókinni - smart? Ég sem legg aldrei áherslu á beinagrindur nema svona helstu atriði - nei ég meina er ekki heldur ósmart að læra heila beinagrind um þýðingu huglægrar afstöðu þess sem vanefnir þar sem m.a. eitt undiratriðið er sjálfstætt starfandi háskólamenn - myndi maður ekki ætla að almennt tjitt tjatt væri nóg í stað þess að þylja þetta upp eins og api??? Þær síast nú inn blessaðar þrátt fyrir allt þar sem ég man þessa beinagrind reyndar þó að fyrningin sé hafin. Ég var sem sagt í prófi í Kröfurétti II - skemmtilegt fag og praktískt vænti ég en ekkert einasta raunhæft verkefni hvorki í vetur né á prófinu, þetta finnst mér ennþá pínu skrýtið þó að maður sé svo sem búinn að sætta sig við að þessu verður seint breytt. Ég geri mér svo sem grein fyrir að ég er í akademísku námi, en hvað (?), myndi eitt raunhæft verkefni drepa mann, nei ég bara spyr!! Sem betur fer eru flestir kennararnir ágætir og þá sérstaklega BB sem er ekkert að stressa sig á hlutunum.
Ég hlakka í það minnsta til að fara í refsiréttinn minn því þar fæ ég í það minnsta raunhæft verkefni, það bregst ekki og þau eru skemmtileg þó að málavaxtalýsingarnar séu frekar blóðugar og ógeðslegar (og svo leysir maður þessi verkefni um hrottalegar nauðganir og morð án þess blikka öðru auganu ).
Jæja eftir góðan afslöppunardag í gær á að hella sér beint í samþættingaraðferð og sundurgreiningaraðferð / högg sem geigar, en beinagrind dagsins í gær var nokkurn veginn á þessa leið:
1. Vídeóleigan Hvammsval
1.1. In her shoes
1.2. Ein gömul
2. Heim
2.1. Samloka og kristall úti á palli
2.2. Blöðin úti á palli
2.3. Sól = freknur
3. Vídeó-gláp nr. 1
3.1. Horfði á þá gömlu
3.2. Dottaði
4. Drengurinn minn fríði kom heim
4.1. Skítugur upp fyrir haus af leikskólanum (þetta er frekar langt atriði og erfitt að muna og gott að stytta það í einfaldlega "skítugur")
4.2. Sofnaði með mömmu sinni
5. Heimilisstörf
5.1. Í vélina
5.2. Ryksuga forstofu
6. Baðtími og háttatími (oft erfitt þegar er svona tvö atriði í sömu fyrirsögn en sleppur)
6.1. Skítugi drengurinn baðaður
6.2. Hreini drengurinn í rúmið
7. Vídeó-gláp nr. 2
7.1. Ma og pa
7.2. Ís úr Hvammsvali í boði pa
8. Sofa - allt of seint
(undir þessu atriði man ég ekkert - skelfing..)

Kveðja
Skeletor (ha ha The power of Greyskull...)

BABABABA....

2006-04-18T18:06:00.000Z

Ritgerðin er klár og búin að skila. Þetta hafðist. Vei vei vei!!! Djö.. skil ég samt vel að fólk fresti svona ritgerð einu sinni eða tvisvar, það er drulluerfitt að slíta sig frá þessu, alltaf hægt að laga og bæta, en svo var tekin harkan á þetta og nú er meistaraverkið innbundið og komið á skrifstofu lagadeildar.
Nú er ekkert nema próflestur næsta mánuðinn. Fyrsta próf þann 29. apríl þannig að það er ekki seinna vænna en að fara að byrja... En svo kemur Júróvisjón, sumarið, grillpartý, sumarkjólar, sýslumaðurinn og smá peningur í budduna (kannski nokkrar freknur). Þangað til eru það bara strigaskór, Magic, nullum crimen sine lege, nulla poena sine lege, rót og hettupeysa.

Kv. R

Fimm ára!

2006-04-10T10:24:00.000Z

Nú er "litli" drengurinn minn orðinn fimm ára og ef næstu fimm ár verða svona fljót að líða eins og þessi síðustu verður hann orðinn 10 ára áður en ég veit af. Afmælisdagurinn byrjaði með látum því að við foreldrarnir gáfum honum forláta "gettó-blaster" sem reyndist vera stórsniðugt því að þá gátum við kúrt aðeins lengur yfir einni sögu eða svo. Við dröttuðumst svo á fætur og tókum til eftir matarboðið sem við héldum í gær og svo tókum við sonurinn til við að baka pönnsur. Þar sem sykurbirgðir voru af skornum skammti og ekki til í heila uppskrift þá slumpuðum við bara einhverju í skál og út komu þessar fínu pönnukökur - og ég sem var að hugsa um að fara í húsmæðraskólann, það er greinilegt að ég þarf þess ekki... Restin af deginum fór í almenna leti. Seinni partinn tókum við okkur til og fórum í fermingarveislu hjá Einari Þorsteini frænda. Við fórum svo á "leigó" og tókum Harry Potter og vorum vakandi langt fram eftir enda voru sumir ansi þreyttir en þetta var afmælisósk Þorra að fá að horfa á vídeó og sofna fyrir framan sjónvarpið eins og unglingur. Amma og afi komu reyndar rétt áður en hann sofnaði með úr á "unglinginn" - alveg ekta úr og svo spil sem kennir á klukku.

Annars er nú formlega hafin prófatörn. Ritgerðin í yfirlestri og kannski smá tími til að rétt líta í námsbækurnar sem hafa beðið ansi lengi eftir því að vera opnaðar!!

Annars hef ég komist að því að ég á frekar erfitt með að blogga, þannig að þið verðið að fyrirgefa mér stopular færslur og formlegar. Skrifa þegar andinn kemur yfir mig, finnst betra að skrifa bara í stílabókina mína þar sem enginn sér... Kannski hentar mér betur að blogga ekki undir nafni þar sem ég er svo heft - veit það ekki??!!

Randó Lín

Draumráðningar...

2006-03-24T09:38:00.000Z

Dreymi þig að þú sért við barnfæðingu, boðar það giftingu mjög bráðlega....

Auglýsi eftir brúðkaupi í sumar!!!

R.P

Twins...

2006-03-23T08:08:00.000Z

Nú fæ ég að sjá alvörunni tvíbura vonandi í næstu viku!!! Ég hef aldrei séð nýja tvíbura - bara gamla þannig að þetta verður algerlega ný upplifun. Ólöf Ingunn og Villi eignuðust sem sagt tvo stráka á mánudaginn. Svo talaði ég við Þórunni í gær sem ætlar að eignast stelpu þann 15. maí. þannig að það verður nóg að gera hjá mér að knúsa smábörn næstu mánuðina og út árið því að Guðrún Ása ætlar líka að eignast barn í sumar. Mig dreymdi sem sagt barnsfæðingar í nótt!!

Randó

Hjartsláttur...

2006-03-19T13:24:00.000Z

Afkvæmið indæla varð svo veikt á föstudaginn. Mér stóð nú eiginlega ekki á sama þegar ég sótti hann á leikskólann eftir símhringingu frá þeim, enda var hann allur einhvern veginn máttlaus og brennandi heitur. Hann hafði orðið veikur eftir hádegið og byrjaði að kvarta undan verkjum í eyrunum. Mér brást tilfinningin núna - ég vissi einhvern veginn ekkert hvort að þetta væri eitthvað til að hafa áhyggjur af eða ekki. En þegar við komum út í bíl varð ég svolítið hrædd því að hann byrjaði að æpa af kvölum. Við brunuðum upp á heilsugæslu þar sem hjúkrunarfræðingur tók á móti okkur - indæl kona sem að kom heim þegar Þorri var nýfæddur. Hún sagði okkur að fara bara strax upp á spítala enda hefur hún sennilega séð skelfingarsvipinn á mér með máttlaust barnið í fanginu. Hún spurði einmitt hvort ég þekkti ekki mitt barn og ég svaraði að sjálfsögðu játandi enda var þetta ekki eðlilegt fyrir hrausta drenginn minn sem eiginlega aldrei fær hita - man ekki einu sinni hvenær ég mældi hann síðast, það eru áreiðanlega tvö ár síðan í fullri alvöru. Hún var svo góð að hringja á undan okkur niður á spítala. Nú upphófst erfið bílferð því að Þorri öskraði enn meira en áður og var við það að lognast út af þess á milli. Ég þorði ekki öðru en að halda honum vakandi. Þegar við komum á spítalann fórum við strax inn. Þegar ég var að ganga inn fann ég hvernig hann alveg snarkólnaði og einhvern veginn fékk kraftinn aftur. Pabbi hans kom úr vinnunni enda vorum við foreldrarnir, orðin dáltítið stressuð. Þegar við komum svo inn á skoðunarherbergi var hann orðinn miklu rólegri og hressari, leyfði hjúkrunarfræðingnum að mæla blóðþrýstinginn og var meira að segja að gera gamni sínu við hana. Svo mældi ég hann og hann var hitalaus - ótrúlega skrýtið. Læknirinn vildi samt halda honum aðeins og honum voru gefin verkjalyf. Við fjölskyldan biðum þarna í einhvern smátíma og Þorri sofnaði. Hann var svo bara orðinn hress þegar hann vaknaði og ekki að sjá að hann hefði eitthvað verið veikur....

Meistari Jakob (gamli)

2006-03-14T08:11:00.000Z

Í haust byrja ég í meistaranámi.... OMG það er eitthvað svo fullorðins (segi ég háöldruð manneskjan - er ekki með neina komplexa sko). Ég byrja sem sagt í haust ef að allt gengur að óskum í vor!! Þá get ég farið að læra skemmtileg fög eins og t.d. verktaka- og útboðsrétt, evrópurétt, ofbeldisbrot frá sjónarhóli kvennaréttar, fullnusturétt og allt um EU Directives on Data Protection and Individual Rights in Health Sector Research o.fl. o.fl.

En um helgina aftur á móti fór ég á skrall með Önnu Lindu Næseril sem að kom sérstaklega til Íslands um helgina til þess að hitta okkur vinkonurnar. Þetta var ljúft en var komin heim um hálf-fjögur (eitthvað er maður (den gamle) nú farinn að daprast en er alls ekki með komplexa yfir aldrinum í alvöru!!). En það var gaman að hitta Önnu Lindu sem hefur gefið mér loforð um að flytja aftur heim í sumar (eða ég fékk hana til þess eftir "tvö" glös).

R.P (eða Randa í sviga)

Jæja, jæja...

2006-03-07T15:09:00.000Z

nú er ég búin að skila ófullbúnum fullbúnum drögum upp á tæpar 17 bls. Veit ekki hversu mikinn húmor leiðbeinandinn minn hefur fyrir öllum athugasemdunum mínum og spurningunum sem ég fléttaði inn í þau... en þetta er í það minnsta búið í bili. Smá breik til að byrja að lesa fyrir refsirétt, kröfurétt og réttarfar já og lagadönskuna sem er náttúrulega ótrúlega skemmtileg (í alvöru)!!! Nóg um skólann - ekki beint intressant blogg-efni.

Ég átti aftur á móti geysilega skemmtilega helgi sem fól í sér engan lærdóm sem er tilbreyting. Á föstudaginn fór ég í óléttu-/innflutnings-/veislu-boð.. Hún Þórunn stórvinkona mín er flutt í Reykjavík- sem eru reyndar dálítil svik við Kópavog en ég fyrirgef henni það þar sem hún flutti nú ekki langt. Hjá Þórunni voru þrjár óléttar píur og svo ég og Berglind Eva. Þær eru sem sagt frjósamar sem fyrr þessar vinkonur mínar og það eru meira að segja á leiðinni tvíburar!! Mér finnst það alveg stórmerkilegt fyrir utan það hvað það er yfirhöfuð merkilegt að geta bara búið til eitt stykki barn!! OMG segi ég nú bara.. verð eiginlega að skella inn mynd af ólétta-genginu bráðlega eða eftir því sem letin leyfir... Ekki spillti heldur fyrir að fá góðar veitingar í návist allra þessara ófæddu barna en Þórunn sú myndarlega stúlka var búin að skella í eina blauta súkkulaðiköku og gera beikon-brauð-epla-bita sem er það besta sem hér á jörðu fæst.

Á laugardaginn skelltum við skötuhjúin okkur í partý hjá Berglindi Helgu. Þetta var Buzz-partý með meiru. Geggjað stuð og Randa Panda sem hefur ekki verið þekkt fyrir áhuga sinn á popptónlist fékk fyrir einskæra heppni hæsta skor kvöldsins. Ég held því fram og mun halda því fram að ég sé gædd yfirnáttúrulegum giskhæfileikum með heppnisívafi enda hef ég átt ótrúlega spretti í t.d. spilum eins og Popppunkti... og þeir sem þekkja mig vita að ég á enga diska með Birgittu eða Britney eða aðra diska yfirhöfuð nema þessa sem ég fékk í fermingargjöf. En nú er ég hrædd um að ég sé forever búin að jinxa þessari heppni minni með því að játa þetta opinberlega. Nei segi það ekki að ég hlusti aldrei á tónlist og hafi ekkert gaman af henni - ég bara kaupi ekki diska (og downloada ekki heldur). Hef meira gaman af því að láta koma mér á óvart og hlusta bara á útvarpið......

Kveðja hin "LAGLEGA" R.P.
(nánari útskýringar á laglegri Rögnu fást hjá Villa hennar Ólafar)

BA-brjálæði...

2006-02-23T15:02:00.000Z

Vinnuskjöl stjórnvalda eru undanþegin upplýsingarétti skv. 3. tl. 4. gr. upplýsingalaganna nr. 50/1996. Þau eru samt ekki undanþegin aðgangi ef þau hafa að geyma endanlega ákvörðun stjórnvalds eða upplýsingar sem ekki verður aflað annars staðar frá... Undantekningarnar í 4. gr. eru undantekningar á meginreglunni. Um þetta er ég að skrifa 15 - 25 blaðsíður. 10 síður komnar 5 - 15 blaðsíður to go. Undarlegustu hlutir verða áhugaverðir þegar maður bara fer að skoða þá! T.d. finnst mér fátt skemmtilegra þessa dagana en að lesa úrskurði úrskurðanefndar upplýsingamála aftur og aftur og aftur og stöðugt uppgvöta eitthvað nýtt.

Lögfræðin í hnotskurn - undantekning á meginreglunni og undantekning frá undantekningunni - ekkert "svona-er-reglan-punktur"... endalausar pælingar um hin minnstu smáatriði. Nú kemur smámunasemin í góðar þarfir!!

Kv. BArbamamma

P.s. mér er það lífsins ómögulegt að skrifa um eitthvað annað en efnið sem hefur átt hug minn allan síðustu vikur enda takmörkuð með eindæmum.

Hef komist að því...

2006-02-17T21:40:00.000Z

... að bjór er góður í hófi þegar maður er að læra - ekki í óhófi...
Kv. R

Spurningar...

2006-02-17T09:50:00.000Z

1. Hvað er klukkan? 10.50 f.h.
2. Fullt nafn: Ragna Rós Pálsdóttir
3. Líkamsgötun: Eitt gróið í vinstra eyra og annað sem er að lokast í hægra eyra (götun á gamalsaldri sem fór út um þúfur...)
4. Hvaða mynd sástu síðast í bíó? Man það ekki einu sinni en hefur áreiðanlega verið einhver barna- og fjölskyldumyndin...
5. Jarða eða brenna? Jarða
6. Fæðingarstaður: Reykjavík
7. Hefurðu komið til Afríku? Já reyndar - ekki inn í svörtustu Afríku reyndar en hef komið í lítinn bæ sem heitir ÐÐÐÐjáda og er hinu megin við Gíbraltar...
8. ...verið handtekin/n: nei hvorki beint né óbeint ;)
9. ...grátið yfir því hvað þú elskar e-n mikið: Já áreiðanlega a.m.k. legið við gráti... svona örlað á einu eða tveimur tárum
10. ...lent í árekstri: Kýs að svara þessari spurningu ekki svo að örlögunum verði ekki storkað...
11. Brauðteninga eða beikonbita : hmmm saman kannski, með eplabita innan í og osti, hitað í ofni...?
12. Uppáhalds dagur vikunnar: Laugardagur
13. ...matur: kjúklingur
14. ...veitingastaður: nammi nammi margir.... erlendir sem innlendir.
15. ...blóm: Dálítið veik fyrir bláum blómum af öllum tegundum, t.d. finnst mér gleym-mér-ei afskaplega fallegt og svooo hentugt, bara hægt að líma það beint á fötin...
16. ...íþrótt að horfa á: Listdans á skautum (parakeppnin er skemmtilegust), einstaka fótboltaleik..
17. ...drykkur: ég vildi að ég gæti sagt vatn en Coca Cola er og verður gott (sama hversu mikið maður reynir að hætta...)
18. ...ís: mmm ferskur ávaxta sorbet
19. ...skyndibitastaður: Friday's
20. ...liturinn: blár
21. ...sjónvarpsþættir: enginn einn þessa dagana - bara það sem ég næ í þessar 10 mín. eftir að ég kem heim á kvöldin og áður en ég fer að sofa..
22. Disney eða Warner Brothers: Hef ekki sest niður og myndað mér skoðun á þessum fyrirtækjum... segi Disney vegna ástarsambands míns til margra ára við Andrés Önd og félaga
23. Hvernig gólfefni er í svefnherberginu? Gegnheilt parket (þarf það að fylgja sögunni að það er eldgamalt?)
24. Hversu oft féllstu á bílprófi? Aldrei (na na bú bú leiðinda prófdómari sem lét mig gera fökking allt sem hægt var að prófa...)
25. Frá hverjum fékkstu síðast tölvupóst (fyrir utan þennan)? Kolbrúnu Lindu skrifstofustjóra lagadeildar um námskeið í lagadönsku sem ég bæ þe vei skráði mig á...
26. Í hvað eyðirðu mestum tíma: lærdóm og drengina mína tvo (sko soninn og pabba hans), BHJ fær nú drjúgan hluta tíma míns hérna á Löbergi líka he he...
27. Háttatími: stundum allt of seint og stundum allt of snemma en sjaldnast þarna á milli
28. Hver verður fyrst/ur til að svara þessu e-maili? Þar sem ég set þetta á bloggið okkar þá á þessi spurning ekki við...
29. Hver er ólíklegastur til að svara? Á ekki við
30. Svörin frá hverjum ertu mest forvitin/n að lesa? Svör allra sem nenna að gera þetta
31. Með hverjum fórstu síðast út að borða: með Kanarí-eyja-förunum
32. Ford eða Chevy: Ford (Escape sko!!)
33. Á hvað ertu að hlusta núna: Ekkert - með iðnaðarmanna-heyrnartól á höfðinu í boði Berglindar Helgu
34. Hvað ertu með mörg húðflúr? Ekkert
35. Hvað áttu mörg gæludýr ? 1 gæludýr, rassgatið hana Andras, Andrösu.. uhh ekki alveg búin að gera það upp við mig hvernig þetta skuli beygt, spyr mannanaefnanefnd, Þórunn hér er kannski komið nafn á bumbuna Andras Ást... (frumnafn kattarins er Sandra..)
36. Hvort kom fyrst, hænan eða eggið? Já og hvenær varð hæna hæna? Er nútíma hænan eins og sú sem var uppi fyrir 500 árum? Já ég bara spyr?
37. Hvaða fræga látna manneskja dettur þér fyrst í hug? Langaði að segja einhvern frægan íslenskan eins og Halldór Laxness en datt reyndar bara Marilyn Monroe fyrst í hug...
38. Á hve marga ætlarðu að senda þennan lista? verður ekki sendur út en settur á bloggið..
39. Fannst þér þú þurfa að leiðrétta stafsetninguna á listanum? Nei las þetta ekki með því hugafari
40. Gerðirðu það? Nei sbr. spurningin að ofan
41. Bættirðu við spurningum? Nei
42. Fylgirðu alltaf leiðbeiningum? Já, er svo takmörkuð, hugsa ekki út fyrir rammann
43. Hvort er skemmtilegra, handboltinn eða auglýsingarnar? Auglýsingarnar - hef reyndar verið aðdáandi auglýsinga síðan að ég var lítil
44. Hvað myndirðu gera við 300 milljónir? Hreinlega veit það ekki - borga fyrir hælisvist mína - hlýtur að vera nett sjokk að fá svona mikla peninga í hendurnar... og þar sem ég er svo óákveðin gæti ég ekki ákveðið það og fengi taugaáfalla og færi á hæli!!
45. Hvaða lýta/fegrunaraðgerð myndirðu fara í? Enga eftir að hafa séð The Swan og líka þætti
46. Ertu fylgjandi stríði? Nei aldrei
47. Ertu ánægð/ur með lífið?Þokkalega maður hefur það aldrei eins fínt og þegar maður er í skóla
48. Hverju myndirðu breyta? Jahh það fer eftir um hvað er spurt. Myndi í það minnsta ekki breyta neinu í mínu lífi eins og er, nógar hafa breytingarnar verið - maður þarf nú að setjast aðeins niður og anda fyrst..

Kv. RangíPoo

King Cheesecake...

2006-02-17T09:35:00.000Z

...er rokknafnið mitt, ekki alveg eins glæsilegt og þitt Dadda ;)

Kv. K.C.

http://www.b2.is/?sida=tengill&id=148377

Klukk....

2006-02-14T16:12:00.000Z

Anna Linda klukkaði mig.... hér koma svörin:

4 störf sem ég hef unnið um ævina:
1. Unglingavinnan (Sunnuhlíð og leikskóli). Bæjarvinnan hét það svo eftir að maður varð 16.
2. Verkfræðistofa Gunnars Torfasonar
3. Línuhönnun, verkfræðistofa
4. Sýslumaðurinn í Kópavogi (get bara ekki slitið mig þaðan enda afskaplega ljúft að vinna þar blikk, blikk með von um vinnu í sumar)...

4 bíómyndir sem ég get horft á aftur og aftur:
1. Pretty Woman
2. Völundarhúsið (Labyrinth m/David Bowie og ungri Jennifer Connelly)
3. Ten things I hate about you
4. Star Wars (með syninum)

4 staðir sem ég hef búið á (tókst að toga þetta í 4 staði he he)
1. Skjólbraut 10, jarðhæð
2. Skjólbraut 10, miðhæð
3. Lautasmári 27
4. V.hv.

4 sjónvarpsþættir sem mér líkar:
1. Lost
2. Friends
3. Sex and tne City
4. Desperate Housewives

4 staðir sem ég hef heimsótt í fríum:
1. Spánn (Ibiza, Benidorm, Kanarí, Alicante, Bilbao o.s.frv. og með viðkomu í Afríku)
2. Köben, DK
3. Glasgow
4. Akureyri

4 síður sem ég skoða daglega fyrir utan blogg (þessa dagana):
1. hi.is
2. retsinfo.dk
3. gegnir.is
4. ursk.forsaetisraduneyti.is/urskurdir

4 matarkyns sem ég held uppá (erfitt að telja svona upp þegar maður er nýbúinn að borða..):
1. Steinbítur
2. Nautakjöt
3. Croissant (á Select)
4. uhhhh bara, bara bland í poka (af því mig langar í það núna en það er kannski ekki matarkyns?)

4 staðir sem ég vildi heldur vera á núna:
1. Heima að leika mér í Spiderman með syninum og pabba hans
2. Í Kaupmannahöfn
3. Á sólarströnd
4. Búin með skólann og að vinna...

4 sem eiga að gera þetta líka:

1. Þórmundur
... og allir sem ekki eru búnir að þessu og langar til.

Kanarí, Kanarí, Kanarí, rí, rí, rí

2006-02-11T16:10:00.000Z

Kanarí í frí er málið. Maður hafði dálítið tengt þennan stað við gigtveikt og gamalt fólk (hmmm og tengdóin sem eru reyndar kornung) en raunin er að þarna er fólk á öllum aldri þó að gráhærðir séu þarna í meirihluta, sérstaklega á hótelinu. Þegar út af hótelinu var komið þá blasti við fólk á öllum aldri. Gamla liðið sat sem fastast á sínum bekkjum sem það hafði slegist um í ljósaskiptunum og fór ekki þaðan allan daginn held ég! Í hótelgarðinum fór sem sagt fram steiking, vægast sagt, skorpubrúnir ellismellir hvert sem litið var. Stríðið um sólbekkina stóð greinilega sem hæst því að þegar maður kom út í garð eftir að hafa sofið út eins og alvöru Íslendingur (maður er í fríi for crying out loud!!) þá voru handklæði á hverjum bekk en ekkert fólk að sjá. Eftir morgunmat fylltist svo allt. Þeir á hótelinu höfðu þó fulla stjórn á þessu öllu saman og jakkafataklæddur maður gekk um með blokk, penna og skeiðklukku að mér sýndist og tók handklæði miskunnarlaust af þeim bekkjum sem honum þóttu standa of lengi mannlausir en handklæddir. Gömlu vinir mínir voru assgoti harðir í sólböðunum og sátu þrátt fyrir að rigningaskýin hefðu hrannast upp og það lá við rigningu.

Við fjölskyldan vorum ekki á þeim buxunum að liggja í sólbaði alla daga og gerðum heilmikið, sbr. neðangreindur listi:
1. Tölvuleikjasalurinn var það sem heillaði ungann mest, vann mömmu sína og pabba 100 sinnum í þythokkí
2. Mínigolf - afskaplega spennandi líka og þar sigraði Þorri foreldra sína líka (hmmm)
3. Verslunar- og skoðunarferð til Las Palmas - það þurfti aukatösku..
4. Go-Kart - tvisvar. Þar kepptu "gömlu feðgarnir" og Þorri jr. og Mæja frænka fóru á míní-mótorhjól
5. Crocodillo-park. Þar voru krókódílar, skjaldbökur, fuglar, hestar, bambar, tígrisdýr, blettatígur, apar, talandi fugl o.fl. Leiðsögumaðurinn var lítill hundur!
6. Tívolí - tvisvar - og parísarhjól fyrir mömmu.
7. Tvisvar leigður bíll. Seinasta daginn brunuðum við fjölskyldan og afi P. hringinn í kringum eyjuna m.a. eftir hrikalegum fjallvegi.
8. Kafbátur þar sem undirdjúpin á 25 m dýpi voru könnuð.
9. Ströndin og sjórinn.
10. Fimmtugsafmæli ömmunnar. Lillinn svaf af sér matinn en vaknaði hress í kráarröltið á eftir.
11. Nokkrar sundlaugarferðir í ískalda laugina og smá sólböð.
12. Almennt flakk og flandur...

Þorri undi sér afskaplega vel í sólinni - hann er sannkallað hitabeltisdýr og það var rétt eins og hann hefði alist upp í heitustu S-Ameríku því hann vildi vera kappklæddur meðan að foreldrarnir voru á stuttbuxum og hlýrabolum. Frændsystikinin öll sex voru prúð og léku sér fullt saman og það skemmtilegasta á kvöldin var leikgrindin í hótelgarðinum
Veðrið var gott mest allan tímann og það rigndi einu sinni. Hitastigið var almennt svona um og yfir 20°, sól alla daga en stundum skýjað hluta úr degi (fyrir veðurþyrstar manneskjur;)).

Kveðja Kanarí-konan og co.

Holtið...

2006-01-22T14:59:00.000Z

.. er virkilega barnvænn staður. Var pínu búin að kvíða því að fara með soninn-næstum-því-fimm-ára á sjálft Holtið en það gekk svona glimmrandi vel. Drengurinn var prúður og stilltur og það hjálpaði gríðarlega að þjónustan við hann var alveg súper. Þeir hafa greinilega fengið börn í heimsókn áður en það virðist ekki alltaf vera tilfellið þegar maður fer svona út að borða. Við byrjuðum á að setjast inn á bar í fordrykk. Hans hátign pantaði sér mjólk á barnum eins og hann hafi aldrei gert annað annað. Settumst svo inn og þar beið hans "hásæti" við borðið. Hann fékk svo fisk (fínasta karfa að ég held) sem hann nartaði svona rétt í enda að spara pláss fyrir súkkulaðikökuna sem búið var að múta honum með :) Svo settumst við aftur inn á bar eftir mat og þar sofnaði hann! Ekki margir sem sofna á barnum á Holtinu ímynda ég mér. Við fullorðna fólkið vorum heldur ekki illa haldin enda maturinn gríðarlega góður - með því betra sem mann fær sko - slurp og slef... og það er greinilegt að það er einhver sérlegur eftiréttameistari þarna (en ég ber mikið skynbragð á hin ýmsu sætindi - mætti segja að sætindi og eftirréttir séu fyrir mér eins og vínið fyrir vínáhugamanninn he hemm..).

Í gær fórum við foreldrar svo aðeins út á lífið... Afi P og drengurinn höfðu það gott yfir "Staugstofunni" á meðan. Núna á sunnudegi er sannkallað letilíf, pabbi að leggja sig, drengur í PS2 (bændurnir á heimilinu fengu hana í bóndadagsgjöf) og mamman að surfa (en þyrfti að vera að læra *andvarp*)

K&K, ErrPa

Furðulegt...

2006-01-20T12:37:00.000Z

.. að ég skuli vera meyja. Sögurnar segja að þær séu alveg ofur-skipulagðar en ég vil ekki endilega kannast við það! Erum að fara út á þriðjudaginn og ég ætlaði að vera búin að: taka til heima, þvo hvert einasta snifsi sem í óhreina tauinu er, vera komin svo miklu, miklu lengra með ritgerðina og heimildalestur, plokka og lita augnabrúnir, kaupa bikiní, sólarvörn o.s.frv. Þetta ætlaði ég að vera búin að gera og fleira til fyrir helgi svo ég gæti nú "slappað" af um helgina því hún verður annasöm (út að borða á föstudag og þorrablót á laugardag). Svo veit ég varla hvenær við fljúgum út á þriðjudag og hvernig við förum út á flugvöll - læt Gamla Mund bara um það að sjá um svoleiðis smáatriði. Veit um tvær sem væru nú alveg með þetta á hreinu (blikk, blikk girlfriends-in mín með skipulagsáráttuna á háu stigi - kannist þið við ykkur?). Reyndar verð ég að viðurkenna að ég er búin að skipuleggja í þaula hvað ég ætla að KAUPA (fallegur listi í mörgum litum).
Meyjur eru líka smámunasamar (þó það sé sykurhúðað í blessuðum stjörnuspánum) en það kannast ég betur við. Ætlaði að skúra forstofuna í gær - endaði með því að ég "þurfti" að þvo veggina, gereftin, loftið og útidyrahurðina líka og ekki nóg með það heldur líka hvern og einn einasta skó. Svo þegar það var búið ætlaði ég "aðeins" að stjúka yfir hilluna í fatahenginu en það endaði í endemis vitleysu og nota bene skipulagningu hinna ýmsu trefla og vettlinga (hmm er ég búin að hrekja þá fullyrðingu mína að ég sé ekki haldin skipulagsáráttu). Gat ekki hætt!!
Hef komist að því að jafnt og þétt álag hentar mér ekki eins vel og að taka'etta bara í skorpum - dugleg einn daginn en endalaust löt hinn daginn - eða er þetta frestunarárátta?

Kv. R. Panda

Erfitt að blogga...

2006-01-17T19:05:00.000Z

.. þegar maður gerir ekkert allan daginn annað en að hanga uppi í skóla. Niðurtalning fyrir Kanaríferð er reyndar hafin því að við förum út eftir viku þ.e. á þriðjudaginn næsta. Hmm mar' ætti kannski að fara að kíkja á sumarfötin, þvo og græja?

Einn BA fundur búinn - kom bara vel út. Ekkert vesen að fara út til Kanarí í tvær vikur - fæ bara smá svigrúm með skilin á drögunum að ritgerðinni.

Andleysi = bloggleysi,
búin að loka bókunum og farin heim,
Kv. Mútter

Ennþá meiri hamingja...

2006-01-13T11:55:00.000Z

..þetta hafðist allt saman. Síðasta prófið fór langbezt og allt í lukkunnar velstandi hér á þessum bæ - hefði satt best að segja ekki getað farið betur (ja nema ég hefði lagt allan minn tíma í lærdóm og engan í mig og mína sem er ekki tilgangurinn með lífinu hef ég komist að eftir lestur margra sjálfshjálparbóka - segir sú sem á eina, sem reyndar var lesin og sú var ekki góð skal ég segja ykkur en það er annar handleggur..). Lánin í höfn og afsláttur af leikskólagjöldum einnig. Annars er þetta alveg frábært hjá Kópavogsbæ sko - maður þarf að skila vottorði frá skólanum um að maður hafi staðist prófin á haustönninni og sé skráður í nám en ekkert svoleiðis vottorð er til hjá háskólanum. Fékk bara prentaðan lista yfir allan námsferilinn (kemur Kóp.bæ. auðvitað ekkert við) en fékk náðarsamlegast að fá fellt út fallið mitt og einkunnirnar enda er friðhelgi einkalífsins mér afar hugleikið verandi í þessu námi sem ég er í! Meðaleinkunnin varð reyndar eftir og ég af hugsjón, auðvitað, strikaði hana út með svörtu tússi! Hélt einhvern veginn að ég myndi svo bara fá pening í hendurnar fyrir, en nei nú sko verður niðurfelling og afsláttur af næstu leikskólagjöldum sem nemur afslættinum sem við hefðum átt að fá í haust. Ég er alls ekki á móti þessum reglum því að þetta hendir út svindlurunum því það borgaði sig víst að skrá sig í háskólann og greiða "skráningargjaldið" og fá svo námsmannaafsláttinn af leikskólagjöldunum - en að nokkur hafi í alvörunni gert þetta veit ég ekki (þeir hljóta í það minnsta að hafa háan vesenaþröskuld) en einhver hlýtur ástæðan að vera fyrir þessari breytingu. Fannst bara einhvern veginn enginn vita neitt þegar ég hringdi þangað en því verður nú áreiðanlega kippt í liðinn... og svo hafa þeir nú sagst ætla að taka tillit til allra aðstæðna þannig að ef maður skyldi nú falla í meira en 75% ætti maður nú að geta fengið einhverjar undanþágur...

Nú stendur yfir heimildarleit mikil - fyrir blessaða BA ritgerðina sko. Ég á áreiðanlega eftir að leggja þetta blogg undir væl yfir þessari ritgerð en so be it. Ég hlakkaði ótrúlega mikið til að byrja á þessu en svo þegar ég er byrjuð þá einhvern veginn nenni ég ekki. Gefst ekki upp samt! Þræla mér í gegnum dönskuna, sænskuna, norskuna og enskuna með hjálp einstaka orðabóka og fer sífellt fram. Taldi mig nokkuð góða í að lesa þessi tungumál að minnsta kosti en hef komist að því lestur lögfræðitexta er allt annað en að lesa rauðu seríuna, Agöthu Christie og Anders And á dönsku og auðvitað hinn sænska Kalle Anka (Anna Linda þú leiðréttir mig bara ef ég er að uppnefna frænda þinn eitthvað). Jafnvel enskan getur snúist upp í óskiljanlegan texta og hef ég þó ófáar enskar Agöthur lesið og ófáa ameríska sápuóperuna séð, meira að segja kíkt á Matlock og fleiri góða og einhverja lögfræðifrasa hlýtur maður að hafa pikkað upp af því. En á endanum hlýtur þetta að hafast!

Kv. Mamma

Hamingja ennþá...

2006-01-04T01:14:00.000Z

Nú er komið út úr tveimur prófum! Kröfurétti og réttarfari. Mín náði báðum - hæ hó og jíbbííjei. Á eftir að fá út úr refsiréttarprófinu sem gekk verst í minningunni allavega, ótrúlegt alveg hreint hvað maður gleymir þessu fljótt, man varla hvað var spurt um á þessu prófi. Var búin að læra mest og best undir þetta andsk.. próf og svo koma "þeir" með 4 tíma próf sem maður á að gjöra svo vel að taka á 3 tímum. Fengum skitið korter til að reyna að lappa upp á klúðrið - isssss!! Leiðinlegt þegar maður getur ekki látið ljós sitt skína vegna svita og titrings við að klára prófið. Það átti að koma út úr þessu prófi í dag en er ekki ennþá komið. Ég og bekkjarsystir mín sátum hér heima í taugaæsingi yfir tölvunni í dag að bíða eftir blessaðri einkunninni en ekki kom hún.. fengum í staðinn að vita að við náðum hinum tveimur! Ótrúlegt hvað svona bið getur framkallað mikil líkamleg viðbrögð eins og nettan sting í bumbuna og titrandi hendur og þó hefði ég talið mig frekar easy going.. Jæja maður fær í það minnsta námslán og það er það sem máli skiptir (he hemm, segir hún í örvæntingu sinni). Já og endurgreiðsluna frá Kópavogsbæ vegna leikskólagjaldanna. Nú þarf maður ekki bara að standa sig til að fá námslánin, heldur þarf maður nú að sýna fram á sama árangur (75%) til að fá endurgreitt frá Kópavogsbæ. Nú greiðir maður nefnilega fullt gjald en fær svo námsmannaafsláttinn þegar einkunnir koma. Pressa, pressa...

Skólinn byrjar ekki fyrr en 9. janúar og þá er námskeið vegna B.A. ritgerðarinnar sem stendur til 13. janúar. Sjálfir fyrirlestrarnir byrja ekki fyrr en 16. janúar skilst mér. Er að reyna að koma mér í gang samt. Ætla upp í skóla á morgun svona rétt til að koma mér í fyrsta gírinn í það minnsta þó að ég geri áreiðanlega ekki mikið. Hmmm maður ætti kannski að fara að snúa sólarhringnum við og fara svona einu sinni "snemma" að sofa!

God nat,
Mamma

First time bloggers...

2006-01-02T18:22:00.000Z

"... bíddu aðeins ég þarf að kyngja munnvatninu." Fjör og aftur fjör. Þeir feðgar eru að ærslast - og það er ekki einu sinni tími til að kyngja munnvatninu.

Við fjölskyldan höfum ákveðið að byrja að blogga á nýju ári! Fjölskyldan samanstendur af 4 ára stórskemmtilegum dreng, þrítugum pabba og 27 ára gamalli mömmu. Sjáum til hvernig þetta á eftir að ganga enda er hér um að ræða afar upptekið fólk...

Árið byrjar alveg hreint ágætlega. Ég og sonurinn sváfum til 11 í morgun og hefðum svei mér þá sofið lengur ef að pabbi hefði ekki vakið okkur. Leikskólinn bíður bara þangað til á morgun enda er ég í "fríi" til 9. janúar. Reyndar þarf ég að fara að drífa mig í að byrja á blessaðri B.A. ritgerðinni svo að ég geti leyft mér að fara til Kanarí í tvær vikur eftir 22 daga!!! OMG hvernig ég næ því svo að klára drögin fyrir 15. febrúar veit ég ekki. Ætli ég verði ekki bara á ströndinni með lappann að pikka - enga suðræna kokteila fyrir mig!

Jæja drengurinn kallar á Lucky Charms - já sukkið er að verða búið og á morgun verður ekki Lucky Charms í eftirrétt!! Grannmeti og átvextir og ekkert annað enda komið nýtt ár og strengd hafa verið heit um heilsusamlegra fæði...

Blessi ykkur í bili,
Mamma